Report ke anusaar tantrik ka ek bara ashram Sonbhadra me tha jaha wo bahar ke logo se bahoot kam milta-julta tha. Yaha tak ki jo log donation dene ke naam par bhi us se milna chahte the; wo us se bhi nahi milta tha. Par yaha Premnagar me koi bhi us se mil sakta tha. Tantrik ke vyabhaar me iss antar ka koi na koi kaaran to zaroor hona chahiye tha.
Tantrik ke khilaf Sonbhadra ke police station me kisi ne aaj tak report nahi likhayi thi. Tantrik ke baare me Sunday aur aaj bhi ek agent ne thora aur gahrai me jaa kar chhanbin ki thi. Usne tantrik ke ek bhakt se bhi baatchit kar thore der pahle hi Aparijita ko apni report phone par di thi.
Agent ko bhakt se pata chala tha, tantrik ko log "Aagnivesh" baba ke naam se jaante hai. Wo bhakt kisi rohani takat se pirit apne beti ke illaz ke liye uske paas gaya tha. Uske jaane par sabse pahle us se medical report dikhane ke liye kaha gaya tha. Bagair doctor se illaz karwaaye aane waale logo ke rohani illaz ki manahi thi. Agar doctor se marj naa sambhle tabhi yaha kisi ko dekha jaata tha. Agar pirit vyakti ko koi roohani takat paresaan nahi kar rahi hoti thi to yeh bhi jaanch karke bata diya jata tha.
Bhakt ne kuchh aur bhi tantrik ke niyam-kayde bataye the, jaise wo kisi bhi aurat ya larki se akele me nahi milta hai aur naa hi uske kisi sisya ko iski izzazat thi. Dusra uske milne ke baad kisi bhi tarah ka daan dena pure illaz ke dauran mana tha. Jaydatar maamle uske sisya hi dekhte hai aur agar unse naa sambhle tabhi tantrik khud saamne aata tha.
Agent ne Aparijita se vada kiya tha ki wo 2-3 din me aashram se jure logo se mil kar aur bhi detail me report dega.
--------------------------------------------------------------------------------------------
Raat 10 baje.
Aparijita dinner bagaira se nipat ke aaj hui recording dekh rahi thi. Is recording me Japu bhi tha.
Japu ne apna role baakhubi nibhaya tha par tantrik ne use tantra-mantra ki jagah khud aage badh kar Anupama ki maa se baat karne ko kah diya tha. Usne Japu ko tantra-mantra ka chakkar chhore aur kisi samjahdari se baat karne me maahir shaksh ke dwara baat aage badhane ka salah diya tha.
Japu ne iss par bhi jor diya tab tantrik ne use jhirak diya tha. Tantrik ne Japu ko kisi aur baba ko dhoondh ke liye kaha jo rupaiyo ke liye preamio ko milane wala kaam karta ho.
Video recording se tantrik ke karyapranali samjhne me Aparijita ko kafi madad mili.
Aparijita ne abhi tak ka tantrik Aagnivesh ka kriya-kalapo ka study kar uska routine note kiya.
Aagnivesh takriban 8 baje subah hi aa gaya tha. Aane ke thori der baad wo mandir ke paas bane kuye se paani lekar nahane ke baad 1 ghante tak koi mantra-jaap karta raha tha .
Takriban 11.30 baje Aagnivesh madir ke saath bane kamre me sone chala gaya. 3.30 baje Aagnivesh uth kar munh-haath dho kar mandir me aake baith gaya tha.
4.00 baje se log Aagnivesh se milne aane lage. Aagnivesh ke saamne ek chhoti si dari bichhi hui thi.
Shera kisi ko bhi tantrik ke paas nahi jaane de raha tha. Wo pahle pucch-taachh karta aur phir kisi ko aage jaane de raha tha. Aagnivesh mandir ke ek kone me uttar (North) ki aur munh karke baitha tha.
Shera ek baar me ek se jayada logo ko nahi jaane deta tha. Aagnivesh ne Shera ko iss tarah logo ko bhejne li liye kaha tha jis se koi Aagnivesh se baat kar rahe banda ya bandi ki baat naa sun sake.
Aparijita tantrik dwara di jaa rahi salah ko gor se sun rahi thi. Aagnivesh ya to kisi deshi jari-buti ke baare me batata ya phir unhe Iswar se karm karte hue madat ke liye kahne ko kahta. Jo log uske paas kisi chamatkaar ki umeed liye hue aate unhe wo wahi jhirak raha tha.
Aagnivesh 6.30 baje tak logo ke saath baat karta raha. Logo ki baatchit se Premanagar thane ke 5 gaun ke aalaba bhi dur-dur se aaye logo ke aane ki baat pata chali. In sabko dekhne ke baad to koi bhi Aagnivesh ko sandeh se bari kar deta par AK 47 ka uske kothri me hone ki nissani ne Aparijita ko Aagnivesh ko clean chit dene se rok raha tha.
Aparijita ne jab recording dekhna suru kiya tha tab live-footage me Aagnivesh kamre me baitha rechargeable light ki rosni me koi bahut hi purana granth padh raha tha; jabki Shera khana banane me vyast tha.
Aparijita ne recorded footage dekhne ke baad live footage par dhyan lagaya. Aagnivesh khana khane ke baad Shera ke saath mandir se kanhi dur jaa raha tha. Thore der me hi wo log camera ke zad se bahar ho gaye. Javed aur Japu ke report ke anussar Aagnivesh aaj mandir me rukne waala tha.
Takriban 20 minute ke baad gufa me lage yantro ne signal dena suru kar diya. Kuchh hi der me Aagnivesh aur Shera gufa ke andar dikhne lage.
Gufa me chhipaye yantro ne waha ho rahi baatchit ko transmit karna suru kar diya tha.
Aparijita ko unki baatchit se pata chala ki Aagnivesh ne aaj aachanak apna program change kar aaj hi yaha aane ka faisala kiya tha. Isliye usne saam ko hi raat ke tantrik-pujan ke liye ssari saamagri manga li thi.
Aagnivesh Shera ko iss week Phulpur ke khandhar me antim saadhna karne ke baare me bata raha tha. Aagnivesh iske baad Phulpur nahi jaane waala tha.
Aagnivesh ke plan ke mutabik agle hafte se Aagnivesh sirf iss ilaake me Mangalwaar (Tuesday) ko aane wala tha aur Raviwaar (Sunday) subah ko chale jaane wala tha. Isme bhi sirf Mangalwaar ko wo logo se milne wala tha. Mangalwaar ki hi raat gufa me sadhana karne aake yehi se wo Raviwaar ko sahar laut jaane wala tha.
Shera ko Gufa me rahne ki anumati abhi bhi nahi di gayi thi. Shera ko Aagnivesh Mangalwaar ki dopahar me hi saaf-safai kar dene ka nirdesh diya taaki use aaj ki tarah raat me safai na karna pare.
Raat 11.30 baje Shera gufa ko saaf karke Aagnivesh ke liye sone ke liye puyaal ka bichhona tayiar karke chala gaya.
Aparijita ne pahle socha tha ki wo kal yaani Mangalwaar ki subah gufa me gadgets ko lagayegi kyuki mandir me gadgets lagane me kaafi der ho gayi thi . Phir usne apna irrada badal kar ek saath hi unhe laga diya tha. Aaj uska fayda mila.
Chuki sabkuchh record ho raha tha isliye Aparijita ne raat jaag kar bitaane se accha so jana samjha. Japu ko bhi usne iss duty se rihai dene ka nischay kar liya. Recording me saaf dikh raha tha ki Japu ne apne taraf se puri kosis ki thi. Waise bhi ab gadgets ke karan kisi aur ki zaroorat nahi thi.
Aparijita ka irrada phir subah 5 baje uth kar drone ke saath thora inspection karne ka tha.
========== =========================== =============
Mangalwaar subah
Aparijita ne ek baar phir micro-drone ko suryoday ke samay chamakne wali rosni waale illake me bhej rakha tha.
Aaj drone ka daayra usne pichhle reading se mile result ke anussar kuchh kilometer ke radius me hi rakha tha.
Par aaj bhi us rosni ka koi shrot ka pata nahi chala . Par iss kabayat se ab jaanch ka dayra thora aur chhota ho gaya.
Aparijita ne drone ka rukh us gufa ki aur kar diya jaha Aagnivesh ruka hua tha.
Aparijita ne drone ko 2 pero ke bicch iss tarah sthir kiya ki wo aasani se nahi dekha jaa sakta tha. Agar dikh bhi jaata to wo apne design ke kaaran koi use bara panchi hi samjhta.
Thori der me hi Shera gufa ki aur aata dikh para. Usne gufa ke bahar se awaaz lagayi. Bahar aaye Aagnivesh ke chehre par raat bhar ka jaagran saaf dikh raha tha.
Aagnivesh thori der baad ek or chal para.
Drone lagatar Aagnivesh par nazar rakhe hue tha.
Aagnivesh sauch aur daaton ke baad Jharne me nahane ke liye chala gaya.
Aparijita ne Aagnivesh ko jab nitya-karma ke liye baithte dekha to usne drone ko un 2 gupt gufao ki or mor diya jinka gupt map ke dwara jikra kiya gaya tha.
Jald hi Aparijita ne us jagah ko dhoondh nikala. Gufa me bana map bilkul perfect tha. Map ke saanketic (hidden/tricky) nissano ko Aparijita solve karke perfect map taiyar kar saath laayi thi.
Dono gufao tak anjaan bande ka pahunchana lagbhag naamumkin tha. Ek to wo khai jaise jagah me bane the jaha pahunchana chaaro taraf sidhi chikni chaantano ke wajah se lagbhag naamukin tha. Aur dusra wo upar se dikhte bhi nahi the. Yaha tak yaa to kisi rassi ke sahare latak kar pahuncha jaa sakta tha yaa phir kai kilometer jungle me ghum kar niche se waha pahuncha jaa sakta tha.
Itni massakat ke baad bhi aam aadmi un gaufao ke chuppaye hisse tak nahi pahunch sakta tha. Gufa 10 feet jaane ke baad hi ek chattani dewaar ke saamne khatam ho jaati thi. Saanketic bhasha me diye gaye hint ko Aparijita ne waha talasha to use wo kunji bhi mil gaya jo gufa ke andar chhupe dunia ko kholta tha.
Chattan par kuchh aakriti bani thi.
Zald hi Aparijita ne wo point dhundh nikala jise dhakelne par ek darwaaja khulta tha.
Pata nahi kitne saalo se kise aadamjaad ke pair waha naa pare ho. Ho sakta tha ki lambe samay se naa istemaal hone ke kaaran us hisse ko dhakelna akele Aparijita ke dwara possible nahi ho pata. Upar se kanhi bhi koi eisa hint nahi tha jis se yeh pata chalta ki gufa ke andar kya hai.
Aparijita ne kisi partner ke saath gufa ke andar jane ka nischay kiya.
Drone ka rukh ek baar fir Aagnivesh wali gufa ki or tha.
Aagnivesh gufa ke bahar ek patthar par baitha bhojan kar raha tha. Bhojan ke baad Aagnivesh gufa me chala gaya jabki Shera mandir ki aur laut para.
Aparijita ne gufa ke andar lage gadgets ke live feed ko dekha to paya ki Aagnivesh gufa me lagaye gaye bichhaban par let gaya hai . Uske paas me hi uska mobile phone rakha hua tha.
Thori dur par raat me ki gayi saadhna ke dauraan jalayi gayi hawan samagri samet kar ek bare plastic ke bag me rakhi hui thi.
Yaha aur kuchh dekhne ke liye nahi tha. Aparijita ne botanists dwara ki jaa rahi experiment ka illaka dekhne ke drone ka rukh mor diya. Usne apne paas uplabd papers se us jagah ka location ka ek andaaza lagaya tha.
Aparijita ne experiment ki jagah ke baare me bilkul sahi andaza lagya tha.
Zald hi drone experiment ki jagah par pahunch gaya. Drone ke live footage me ek bara sa illaka kaante daar taaro se ghira dikhyai para. Saaf pata chal raha tha ki kaante-daar taaro ko jungli jaanwaaro ko rokne ke liye lagaya gaya tha.
Iss ghire illake me andar aane ke liye sirf ek hi gate tha; jis par ek bara sa taala latka hua tha.
Drone dheeme rafttar me us illake ka chakkar laga raha tha.
Ek jagah Borewell ke dwara paani ka bandobast dikhayi diya. Andar kai jagah baans ke khambo, puyal aur miiti ki khappr se chhoti-chhoti jhopariya bani thi. Wahi 2-3 chhote-chhote eento ki khotharia bhi bani thi. Par waha kisi ke hone ki koi nissani nahi dikh rahi thi. Pure illake me tarah-tarah ke paudhe lage hue the jinme se kuchh ko Aparijita ne aaj tak nahi dekha tha.
Is ghire illake ke paas hi 3 quarters bhi bane hue the. Waha abhi sannata pasra hua tha. Aparijita ne drone ko un quarters ki mor diya.
Drone quarters ke aas-paas udh raha tha.
1 quarter ke bahar office likha hua tha. Saath me hi ek lakri ke signboard par research project ka naam bhi likha tha. Is se saaf pata chal raha tha ki is quarter ko hi office ki tarah istemaal kiya jaa raha tha.
Office ke chaaro aur bhi sannata pasra tha. Office ke aas-paas ki jagah ko dekh kar hi lagta tha ki kai dino se yaha koi nahi aaya hai.
Baaki dono quarters ke darwaajo par bhi taala latka tha. Aparijita ne drone ko un quarters ke chhato se gujaara to paya ki quarters ke aangan ko chatt se lohe ke grill se ghera hua hai. Sayad yeh bandobast junglee jaanwaro ya bandro ko quarter me ghusne se rokne ke liye kiya gaya tha.
Quarter ke aangan per ke paato se bhara para tha. In sabko dekh kar lagta tha ki saayad kai hafto se inn quarters me koi nahi aaya hai. Par kaantedaar taar se ghire area me kai eise phoolo ke paudhe the jinhe waqt-waqt par paani jaroor chahiye tha. Inse Aparijita ne anumaan lagaya ki koi na koi yaha daily aa ke paudho ko paani de jaata hai.
Aparijita ne drone ke acmera ko zameen par zoom kiya to paaya ki gate ke paas cycle ke tyres ke nisaan bane hai jo baare ke andar tak gaye hue the. Quarter ke peeche ek 8-10 ka feet ka kaccha raasta dikhayi para jo jungle ke aur andar ki or jaa raha tha.
Aparijita ne drone ko usi raaste ke baare me pata karne ke liye uske upar se jungle ki or mor diya.
Raasta bas kaam chalayu tha. Saaf pata chal raha tha ki mahino se us par car ya jeep jaisa koi vahan nahi gujra hai. Insabki wajah se raaste ke bich-bich me bhi uche-uche ghaash-phush ug aaye the.
Takriban 1.5 km ke baad ek aur kaante-daar taar se ghira hissa dikh para. Yeh hissa pahle waale jitna bara nahi tha. Paas hi lakri aur eento se bana ek chhota sa ghar bana tha. Ghar ko dekh kar saaf pata chal raha tha ki yaha koi rahta hai.
Ghar ke deewalo se kaante-daar taar bandh kar uske saamne ke hisse ko ek boundry ka skal de diya gaya tha. Ghar aur ghire research area ke taar ke paas ek khaas kism ke paudhe laagye gaye the jo is tarh se uge hue the ki unko paar kar ke ek chhota sa khargosh bhi nahi jaa sakta tha.
Sayad yaha ke ghar me rahne wala banda phulo ka bhi sokin tha. Us chhote se ghar ki chaardewari ke andar kai tarah-tarah ke phulo ke paudhe dikh rahe the.
Drone dwara lagatar live footage bhej raha tha.
Darwaje pa koi taala nahi laga tha. Kamre ke andar se light bahar tak aa rahi thi. Raaste me Aparijita ko research-center se yaha tak aati electricity ke khambe nahi dikhe the. Aparijita ne isse suljhane ke liye jayada maatha-pachhi karna theek nahi samjha. Usne apna dhyan research ke liye ghire hisse par lagya.
Yaha ke aur main research-center ke paudho me kaafi difference tha. Dhyan se dekhne par mitti ke color me bhi kuchh fark dikhayi de raha tha. Aparijita ne iss chhote research-center ke aas-paas ke footage paane ke liye drone ko ek daayre ke andar hi ghumana suru kiya.
Aparijita ko Kucch hi dur par ek prakritik jharna dikh para.
Tabhi Aparijita ko us chhote ghar se ek 35-40 saal ka gora 5.8 feet lamba sehatmand aadmi nikalta dikh para. Us skash ne sleeping gown pahan rakha tha.
Wo shaksh us chhote se garden me ek tin se ghire shed me ghus kar ek paani dene wala pipe nikal kar bahar rakhne ke baad ek baar phir se shed me ghush gaya.
Jab wo aadmi tin ke shed se bahar aaya tab tak garden me lage nal se paani aane laga tha. Isse us shed me paani se related motor ya eisa hi kuchh aur arrangement hone ka Aparijita ne anumaan lagaya.
Wo aadmi koi gaana gungunta hua garden me paani dene laga. Paani dete hue us bande ke chehre par prasantata dikh rahi thi.
Aparijita ko aaj jitna drone ke jariye janana tha wo jaan chuki thi. Usne drone ko wapas kiya aur apne quarter ke aur laut pari.
Saam ke samay Aparijita apne quarter se apne cycle se Premnagar ke prasidh Radha-Krishan ke mandir ki aur jaa rahi thi. '
Mandir thane se adhik duri par nahi tha. Thane ke paas se ek kachhi sarak ke jariye waha tak kam samay me pahuncha jaa sakta tha.
No comments:
Post a Comment