Premnagar Thana

Subah 9 baje ke kareeb Arpita aur Aparijita Premnagar ke liye nikal pari. Aparijita ne jeans aur shirt pahan rakhi thi. Sare saaman ke list Arpita ne kal hi ek shop me de diya tha jaha se wo saaman ek chhote truck me bungalow par pahunchane wale the. Waha se Saitan Singh use saath lekar Premnagar  ke liye 4 baje ke baad chalne wala tha.

Theek 10 baje Premnagar thane ke compound me XUV ruki.

Xuv se do khubsurat larkiyo ko nikal thane me aate dekh kar bahar khare sipahi Bacchelal Pandey ka munh khula ka khula rah gaya. Use lag raha tha jaise film ki heroines kisi film ke parde se nikal waha aa gayi hain. Premnagar thane me kai saalo se siwaye gai, bhais aur bakario ke alaba kisi aur thane se asambhit insaan, jaanwar ya pankshi ne kadam nahi rakha tha. Eise me ...   

Becahre Bacchelal Pandey ko thane me har koi "Jap baba" kah kar hi bulata tha aur jo baad me sirf Japu ho gaya tha. Is naamkarab ke picche bhi ek kahani hai, par wo fir kabhi. 

Aparijita aur Arpita thane ke andar pahunchi  jo thana kam aur musayra jayada lag raha tha. Subinspector Ghanshyam darwaje ki aur munh kiye aankhe band kar ke sher suna raha tha. Ghanshyam ne apne shirt ke saare button khol rakhe the. Uske baal bikhare huye the. Lag raha tha maano koi deewana sayar apni sher suna raha hai.

Ghanshyam ke saamne 6-7 policewale kursiyo par baithe the. 1-2 to baniyaan me hi baithe the. Pairo me jute sirf ek ne pahan rakhe the aur ek to bakayda palthi markar kursi par virajmaan tha. 

Ghanshyam jis tarah se apni ghatia sher sunata hua use Ghalib ki likhi bata raha tha us se  Chacha Ghalib kabra me dard se karah rahe the.

Ghanshyam ke saamne baithe policewale wah-wah kar ke use daad de rahe the.  Ab chuki SI shahab ki aankhe band thi so wo to dekh hi nahi sakte the aur baaki logo ke sar ke peeche aankhe na hone ke karan wo sundariyo ke dedaar se mahroom the. Aur jisne dedaar kiya tha wo abi tak yehi samajh nahi paaya tha ki wo khawaab dekh raha hai ya haqiqat.  Jab chand seconds beet jane ke baad bhi kisi ko musayra se uthe nahi dekh  Arpita ka sabar ka baandh tutne hi wala tha. 

Arpita ke krodh se laal chehre ko dekhte hue Aparijita ne musayre me saamil hone ka faisala kar liya.

Aparijita ne muskurate hue kaha "Wah!! Wah!! kya sher tha!"

Achanak ek janani awaz sunkar sab chaunk gaye aur aankhe  phar-phar ke unhe dekkhne  lage.

"Sub inspector Ghanshyam Ram! Kirpya iss kagaz ke tukre par nazar dalenge " Arpita ne use ek lifafa thamate hue kaha.

Kagaz padhte hi  Ghanshyam Ram salute karke tan kar khara ho gaya.

"Sub inspector  Ghanshyam Ram aapka Premnagar thane me swagat karta hai, madam!"

Ghanshyam zaldi-zaldi baaki policewalo ko Aparijita ka prichay dene laga. 

Thore hi der thane ka mahol badal gaya tha . 

Policewale apni wardi me proper dhang se baithe the. Andar ke kamro me baithe police wale bhi bahar aa gaye the. 

Aadhe ghante ke baad baad Arpita wapas Sonbhadra laut gayi. 

Aparijita waha ke staff se ek ek kar mil rahi thi aur unse ek dusre ke baare me puchh rahi thi. Use yeh dekh kar khusi hui ki kisi ne kisi ke baare me koi bhi negative baat nahi ki thi.  Aparijita ne  paya ki Gopal Yadav  ki saare policewalo ke bich acchi reputation hai. Har koi uski taaref kar raha tha. Gopal police verification ke kucch papers ke silsile me gaun me gaya hua tha. Par kisi ne bhi use Gopal kah kar nahi kaha tha. Har kisi ne use Gopu kah kar hi sambodhit kiya tha. 

Aparijita abhi bhi Jeans aur shirt me hi thi. Usne dopahar ke baad SI aur head constable Hari lal ko apne cabin me bula kar unse thane ke had me parne wale area ki jaankari lene lagi. Unki baato se use pata chala ki inn logo ko kisi tarah ki saazish ka pata hi nahi hai aur saare log yaha duty karke khush hai. SI Ghanshaym to kushi me kah utha ki wo to chahta hai ki retirement tak yehi rahe. Yaha ke baare me batata-batata wo apni likhi hui 1-2 sher yaha ke prakirtik sundarta par bhi suna gaya.

Aparijita ne Ghanshyam aur Harilal ko uske saare saaman ke saam 5-6 tak aa jaane ke baare me bata kar unko adjust karne me unki madad maangi. Vaastav me Aparijita ko samaan adjust karme ke liye koi madad ki zarurat nahi thi.  Aparijita thane me mauzud staff ke reactions ko alag-alag paristhitio me daal parakhte huye apne aage ke plans ke liye sabka role tay kar rahi thi.

Aparijita ne Ghanshyam ko picchle ek saal ke crime aur mukhbiro ke baare note banane ko bhej Harilal se Gopal ke baare me baat karne lagi. 

"Madam! Gopu to hamesha se hi har bande ki madad karne ko taiyar rahta hai aur wo bara hi hasmukh banda hai. Aajkal  who thora sanjida rahne laga hai. Jab uske family ke saath trajedy hui thi to woh to jaise hasna hi bhul gaya tha. Dheere-dheere hum aur humari family ke support se wo bahut had tak normal to ho gaya hai; par abhi bhi wo bheetar se bahut dukhi hai. Hume dikhane ke liye wo humse hansi mazak bhi karne laga hai par hume pata hai ki wo bas dikhawa kar raha hai taaki koi aur use samjhane ya saantavna dene na aa pahunche."

Harilal bara hi sanjida ho kar baat kar raha tha. Uski baato se lag raha tha ki Gopu ki trajedy jaise uske kisi family member ki hi trajedy ho.

"Humne bhi ab use iss bare me kahna chhor diya hai. Wo humare itne karib raha hai ki hum samajh jaate hai ki kab wo acting kar raha hai aur kab nahi.  Mere upar to uske kai ahsaan bhi hai. Usne ek baar to apni jameen girvi rakhkar meri beti ke illaz ke samay rupaye diye the."

Harilal ke ankho ke kono me ansu ki bund jhalak uthi.

"Yaha eisa koi banda nahi hoga jiski Gopu ne madad nahi ki hai. Dheere-dheere sab logo ka saath pakar who bahut had tak pahle jaisa ho gaya hai par abhi bhi uska purana wala andaz wapas nahi aaya hai. Madam agar kisi tarah aap use  pahle jaisa kar paye to yeh aapka hum par bara upkar hoga. Wo mera saga to nahi hai par usne mere liye wo kiya hai jo apne sage bhi aaj-kal nahi karte."  Yeh kahte kahte Hri lal ki awaz bhar aayi .

------------------------------------------------------------------------------------------------------------------------

Saam 5 baje tak ek chhote truck me Arpita dwara bheja gaya sara saman lekar Saitan Singh aa gaya.  Saman unload aur adjust karwa ke Saitan singh 7 baje Aparijita se vida lekar gaya.  Iss bich Gopal bhi aa gaya tha. Gopal ko Aparijita se milwaya gaya. Gopal gore rang ka 5 feet 9 inch lamba aur gatheele badan ka maalik tha. 

Aparijita Gopal Yadav se takriban aadhe ghante ilake ke baare me jaankari leti rahi. Use yeh jaankar sukhad acharya hua ki agal-bagal ke gaun me Gopal ko bacche Gopu mama kahte hai aur uske liye takriban har ghar ke darwaje khule hue hai. Jaha dusre police wale mama kahne par chidh jaate hai wahi Gopu ko iss se koi chidh nahi thi.

----------------------------------------------------------------------------------------------------------------------

Raat 8.30 baje Aparijita apne quarter me baithi thi. Usne aate  waqt thane me sabhi ko uske join karne ki baat abhi public me batane se mana kiya tha.

Aparijita cooking pasand thi aur daulat ka agar hone ke baawjood wo kabhi-kabhi khud hi kuchh khash dish banati thi. Par jab usne sarfarosh join kiya tha to usne job nature ke karan sadharan  khana banana bhi seekh liya tha jo kuchh missions me uske bahut kaam aaye the. Premnagar me rahne ke dauran use khud hi khana banana tha taaki thane ke saath-saath wo Sarfarosh ke kaamo ko bhi ekaant me kar sake.

Aparijita abhi   kya banaye yeh soch hi rahi thi ki darwaje par knock hua.

Usne darwaja khola to saamne ek adher mahila khari thi.

"Madam, main head constable Harilal ki patni Ganga hoon. Aapse parichay karne aayi thi." Adher mahila ne muskurate huye kaha.

Adher mahila ke chehre par mamta ki eisi abha dikh rahi thi jo kisi ko bhi apne sneh ke chhaya me vishram karne ko aakarshit kar sakti thi. Usne thore hi der me baato se eisa sama bandha ki ab yeh kahna muskil tha ki Ganga chand minuto pahle tak Aparijita ko bilkul nahi jaanti thi.

Thori der tak idhar udhar ki baate hone ke baad Ganga ne Aparijita se raat ke kahne ke baare me pucha. Aparijita ne Ganga ko bataya ki wo bas banane hi wali hai. 

"Dekho beti! Tum bhale hi unki afsar ho par tumhe Ganga kaki ki baat manani hi paregi. Aaj raat ka khana tum hamare ghar par khayogi. Yaha sab mujhe kaki kahte hai. Aap bhi kah sakti hai ya phir jo aapko jo aacha lage!"

Ganga kaki ke baat karne ka lahza eisa tha ki Aparijita ko laga jaise uska koi saga us se payar bhare ulhane de raha ho.

"Ye to aap maanti ho ki main aapki afsar nahi ho. Isliye aaj se aap mujhe mere naam se hi bulayengi. Aapke pati aur mera sambadh mathat aur afsar ka hi rahega par aap aaj se humari kaki hui. Main kapre badal kar aapke saath chalti hoon."

---------------------------------------------------------------------

30 minutes ke baad Aparijita Harilal ke quarter me baithi thi. Waha uska parichay ek 23 saal ki Gauri naam ki larki se hua jo Harilal ki beti thi. Gauri ki saadi ek fauzi se hui thi. Uske sasural me sirf saas aur sasur hi the jo pichale 2 mahine se treeth yatra par gaye hue the isliye wo yaha rah rahi thi .

Thori hi der me Aparijita ne apne baato ke jaado se waha eisa sama bandh diya ki lagne laga ki wo usi family ka hissa hai. Ab tak Harilal bhi aa gaya tha. 

Raat 10 baje ke karib Ganga kaki Aparijita ko uske quarter tak chhor kar gai.

---------------------------------------------------------

Aparijita raat 11 baje tak Arpita se baat karne ke baad soyi.

Raat 1 baje ke kareeb use kisi ke gaane ki awaz se Aparijita ki neend tuti.

Kisi ke gaane ki awaaz kanhi pass se hi aa rahi thi. Koi ek purana filmi sad song madhur awaaz me gaa raha tha.

Thane me 5 quarters bane the. Harilal wale hisse me 3 quarters bane the. Pahle 2 quarters sipahiyo ke the jisme se ek me Japu rahta tha aur dusre me Rohit naam ka constable(sipahi) rahta tha.

Thane ke pichhli boundry ke saath Aparijita aur Gopu ke quarters bane the jo ki baaki quarters ki apeksha naye the.  In dono quarters  ke peeche thora khali jagah bhi tha jise Gopu ne phulwari ka roop de diya tha. Phulwari wali jagah kucch eise boundary wall aur quarter ki deewar se ghiri thi ki waha sirf quarter ke andar se hi pahuncha ja sakta tha.  Boundary wall bhi karib 15 feet uncha tha aur ek  sarkari  failed project ki nisaani thi.

Sangeet-premi Aparijita se raha nahi gaya. Wo apne kapre badal quarter ke peeche ki taraf chal pari jidahr se gaane ki awaaz aa rahi thi.

Aparijita ne Gopu ko phulo ki kayariyo ke paas ek chatayi par let Kishore kumar dwara gaya, Majrooh Sultanpuri ka likha aur mahan sangeetkaar S. D. Burman ke jadui suro me sajaya geet ko gaate huye paya. Gopu ki awaaz bahut hi acchi thi aur wo gaa bhi bilkul sur me raha tha. Geet maano jaise uske dil se sidhi nikal rahi thi. Sayad yehi  wazah thi geet sunane wale ke dilo ko chhu raha tha.

Aparijita Gopu ki or badh chali.

Gopu Aparijita ke aagvan se bekhar takiye par sar rakh kar aankhe band kiye huye gaa raha tha. Uske daaye daraf kamar ke paas ek chair rakha tha jis par ek table lamp, ek ulta novel paani ka bottle ke saath rakha tha. Lagta tha jaise wo novel padhte-padhte lamp band karke leta ho. 

Aparijita ne dheere se chair ko khali kiya aur uspar baith gaana sunne lagi.

Gopu gaaye ja raha tha .

"Badi sooni sooni hai
Zindagi yeh zindagi
..   ... ....    ... .... ..."

Gaana sunte-sunte Aparijita jaise us gaane me hi kho gayi . Gaana khtam hone par uska dhyan tuta. 

 "Gopu tum to bahut accha gaate ho! Tumhara naam main annual police function ke liye  recommend karungi."  Aparijita ne halke se taali bajate hue kaha.

Gopal ne jab taali ki awaaz sunkar apni aankhe kholi to Aparijita ko apne samane baitha dekh kar harbara kar uthne hi wala tha ki Aparijita use araam se lete hi rahne ko kah uska hosala badhate huye kaha, "Are, kaha jaa rahe ho?  lete raho. Mujhe kucch aur gaane sunane ka mauka do."

“Madam! Itne dino se yeh quarter khali tha isliye mujhe dhyan nahi raha aur main roz ki tarah hi yaha sone aa gaya. Yaha phoolo ke khusbu ke beech acchi neend aa jati hai. Picchle sir to kabhi quarter me rahne nahi aaye  isliye kai saalo se yaha aake sone ka routine sa ban gaya tha." 

"Tumne jis khubsurat tarike se iss jagah ko phulwari me tabdil kiya hai wo kaabil-e-taarif hai. Bheeni-bheeni phulo ki khusbu se bhari iss phulwari-rupi prakirti ki god me sone ka bhala kiska man nahi chahega!"

Aparijita ne Gopu se thori der baat karke jaan liya ki Gopu ka rujhaan geet-sangeet par hai to wo filmi geeto par Gopu se baat karne lagi. Aparijita ne baato ke jaal me Gopu ko aisa phasaya ki kab Gopu sad song ko bhul kar  khushi bhare geeto par baat karne laga; use khud hi pata nahi chala.

Kafi der tak geet-sangeet par baat karne baad Aparijita ne Gopu ko kaha "Dekho thane me to hum afsar aur mathat hain; par thane ke bahar to hum dost ho sakte hai. Tumhare baare me sabhi ne kaha ki tum sabki madad bina dhol pite karte ho aur tum kabhi bhi kisi ki jaati baat ka dusre se jikra nahi karte ho ....."

Aparijita Gopu ki taarif kar rahi thi par taarif eisi ki jaa rahi thi ki kanhi se zara sa bhi banawatipan nahi jhalak raha tha. Wo to jaise seedhe Aparijita ke dil se uske zubaan tak aa raha tha. Dil se ki gayi taarif hamesha saamne waale ke dil ko chuuti hai. Gopu ke saath bhi wahi ho raha tha.

"Har insaan chahta hai ki uska koi eisa dost ho jo uska har haal me saath de aur uske raaz apne tak hi simit rakhe. Aur agar koi eisa insaan mil jaaye to us insaan se to har koi dosti karna chahega. Tum mere dost banoge?" Aparijita ne taarif karte huye baat aage badhai.

"Kaisie baat karti hai aap, madam! Aap jaise kaabil aur budhhimati larki se to koi gadha hi dosti nahi karna chahega. Par dar lagta hai madam. Kanhi mera koi mazak aapko bura naa lag jaaye aur aap naraz ho kar mujhe line haazir kara den. Ab mazak me kabhi kabhi thora jayda to ho hi jata hai." Gopal ne thora sakuchate hue kaha.

"Bhai! Itna to har kisi ko pata hona chahiye ki agar aap dusro se mazak kar rahe ho to aapke andar saamne wale ka mazak jhelene ka bhi maadda hona chahiye. Itna zarror hai ki har riste me ek boundry line hoti hai jiska sabko respect karna chahiye. Ab upar wale ke meharbani se itni akal hai mujhme."

Aparijita apne yaha rahne ke dauarn ek bharosemand saathi to chahti thi par wo yeh bhi nahi chahti thi ki Gopu uski baato ka koi galat matlab samajh baithe.

Baat kuchh der me phir se geet-sangeet par chal nikali. Gopu ne kai saalo se kisi se itni lambi baat-chit nahi ki thi. Usne agar gaur kiya hota to use pata chalta ki Aparijita khud kam baaten kar rahi thi par wo baaten iss tarah se kar rahi thi ki Gopu utsahit ho kar apni filmi geet-sangeet aur gaayako ke baare me jaankaari saajha kar raha tha.

Aparijita ne jab paaya ki Gopu gayak Kishore Kumar ka fan hai to wo Kishore Kumar ke gaaye geeto aur bhartiya film jagat ke sunhare daur ke baare me Gopu se baat karne lagi.

Aparijita ke geeto ke bare me gyan dekh kar Gopu us se prabhabit hone laga tha. Aparijita ne use kuch geeto ke mukhre bhi gaa kar sunaye. Wo Gopu jo kucch samay pahle udashi me duba gaana gaa raha tha ab wo Gopu kanhi aas-paas bhi nahi dikh raha tha.

Aparijita ne baatchit ka rukh dusre or mor Gopu ke maanviya pahluo ki prashansha ka muaka banaya.

“Achha yeh batayo; tum pure gaon ke mama kaise ban gaye? "

“Madam! Yeh sab Ganga kaki aur Mukhiyaji kee den hai. Unke kahne par maine gaaun ke kucch larkiyo ki madad ki. Un larkio ne mujhe bhaiya kah kar bulana suru kar diya  aur dheere dheere gaon ki aurate bhi bhaiya kahne lagi. Dekhte hi dekhte main pure gauon ka bhai aur bachho ka mama ban gaya.  Ab chuki wo mujhe izzat se bhai aur mama kahte hai to maine bhi kabhi iss baat ka bura nahi mana.  Lekin iska ek fayda yeh hua ki aaj mere liye gaaun me sabke darwaje khule hue hai."

Aparijita ke jaane ke baad kaafi der tak Gopu Aparijita se hui baato ke baare me hi sochta raha. Wo apni udashi ko bhool aaj Aparijita se mili sangeet ki jaankaari ke baare me hi soch raha tha. Uske man me Aparijita ke liye aur bhi aadar aa chuka tha. Aparijita ki jagah koi aur hota to wo uski raat me neend kharab karne ke liye uski class laga chuka hota. Par Aparijita ne naa sirf uska protasahan kiya balki gaaun ke logo ki madad karne ke liye uski sacche dil se taarif bhi ki thi.

Dusri taraf Aparijita ko vishawas ho gaya tha ki Gopu ki halat utni bhi buri nahi jitni Arpita ko report mili thi. Gopu ke saathiyo ne use takriban dookh ke ghere se bahar nikal hi liya tha par tanha hone par use phir se purani baaten yaad aa jati hai. Aparijita ko umeed ho chali thi ki agar sahi tarike se step by step aage badha jaaye to Gopu phir se apne purane roop me aa jaayega. 

--------------------------------------------------------------------------------------------------------------------

Subah thane me pahunch Aparijita ne thane ki gaariyo ka muyana kiya. Thane me 1 Jeep aur 2 motorcycle thi. Use Arpita ne subah bataya tha ki  Arvind naam ka Sarfarosh ka ek agent 20 km ke duri par gaariyo ka service station chalata hai.

Aparijita ne Arvind se baat ki. Arvind ko pahle hi Aparijita ka har order follow karne ka instruction mil chuka tha. Aparijita ne Arvind ko kuchh nirdes dene ke baad Gopu, Japu aur ek aur constable ko teeno gaariyo  ke sath unke maintenance ke liye Arvind ke service center bhej Ghanshayam (SI) aur Harilal ko meeting ke liye bulaya.

"Hamare thane ke area me kuchh desh virodhi karya kiye jaane ki intelligence ki report mili hain.Report ke anusaar gaaun ke logo ko dheeme oar yujanabadh tarike se bargala kar parsasan ke khillaf karne ki saazish rachi jaa rahi hai. Saath hi yeh bhi pata chal hai ki yaha ke Jungle ka upyog kucch durdant kisim ke aparadhi chupne ke liye karne lage hain. Par unhone chuki apni harkaten saabhdani se chhupa rakhi hai; siliye abhi tak police department yaa gaaunwaalo ko iski koi bhanak nahi hai."

Aparijita ne ek pal shrotao ki or dekha jinke chehre par uski baato par avishwaas dikh raha tha. Aparijita pal bhar ko chhup rahne ke baad aage batane lagi.

"Yeh baaten hum 3 logo ke alawa kisi ko pata nahi chalni chahiye. Mujhe yeh saari report sidhe Rajyapal ke office se mili hain. Mujhe yaha par specially isi liye bheja gaya hai aur normal process se hat kar pahle hi yaha ki halat ko sudharne ke liye kucch moti rakam bhi allot ki gayi hai. Agar aap dono me koi bhi desh ke liye marne se darta ho to abhi bolo taki uska transfer kara kisi desh par mar mitne ko taiyar sipahi ko yaha laya jaye."

"Madam, Jaan to ekdin jaani hi hai aur agar wo desh ke kaam aa sake to iss se acchi to koi baat ho hi nahi sakti hai." Ghanshyam ne dridh swar me kaha. Harilal ka sar bhi smarthan me hila.

"Mujhe bhi aapse yehi aasha thi aur aap logo ke baare me Intelligence ki bhi yehi report thi. Phir bhi main apne tassli ke liye aaplogo ke munh se sunana chahti thi.  Maine kuchh plans banaye hai. Unhe gaur se sune aur uske baad us par apni rai mujhe bataye."

Aparijita ne apna plan ek bare paper par kalam se sketch banate huye batana suru kiya.

"Thane ke building me kafi jagah hai. Sabse pahle to yaha bane bahut bare-bare kamro ko baant 2-3 kamre aur banane honge. Jisme se 1 ko hum interrogation ke liye istemaal karenge. Maine teeno kamre ke baare me detail iss paper par likh diya hai. Chuki  teeno kamre ke liye alag se chhat dalne ki jaroorat nahi hai; isliye ye jaldi ban jayenge.  Iske liye aap aaj hi local building material supply karne wale, gaaun ke hi raj-mistri aur mazduro se baat kar len. Un sabka payement daily subah aate hi kar dena taaki unhe ye na lage ki unki mazdoori maari jayegi. Kosis karo ki wo log extra mazduri lekar daily 12 ghante kaam karen . Taaki ye sara kaam 7-10 dino ke andar hi ho jaye. Ab aap kamro ka detail dekh kar bataye ki isme kuchh change to nahi chahiye." Aparijita ne papers unke taraf badhate hue kaha.

Dono ne design dekh kar kah design par apni sahmati jatate huye aasha prakat ki saara kaam wo 1 hafte ka andar khatam karwa lenge.

"Achha! Ab aage ka plan suno. Meri yaha joining ki baat jab tak chhup sakti hai; hum chhupa ke rakhenge. Iss liye jab tak yaha kaam chal raha hoga main din bhar quarter me hi rahungi  aur raat ke duty ke dauran  thane me rahungi. Aap logo se agar din me  kabhi meeting ki jaroorat pari to aap dono Gopu ke quarter se hote hue pichhe se mere quarter me aayenge.”

Ghanshyam aur Harilal ke sar sahmati me hila.

“Kamro ka kaam ho jane ke baad bhi main apne cabin me hi rahungi aur bahut jarroorat parne par hi kisi aam aadmi se milungi; iske liye aap logo ka yeh prayash karna parega ki logo ko mere paas aana hi naa pare. Main samjahti hoon ki iss tarah se hum kuchh hafte to mera yaha aana logo se raj rakh hi sakte hain."

Itna kah kar Aparijita ne apne dono shrotayo ko dekha jo sanzidgi se uski baaten sun rahe the.

"Hum yaha 14 log hai. Hume 2-2 ke groups banane hai. Subah, dopahar aur saam hum sab ko rounds par nikalna hai. Iske liye suru me hum cycles ka istemal karenge ya phir paidal jayenge. Jo bhi round par nikalega wo saade dress me hoga aur kosis karega ki kisi bhi tarah se kisi gaonwale ki madad kar sake. Madad iss tarah se nahi karni hai ki yeh zabardasti ki madad lage; nahi to log shaq karne lagenge. Round ki timing bhi alag alag hogi. Kisi din round laga kar bhi thana aa sakte hain yaa imaandari se round laga ke phone par report de sidhe ghar jaa sakte hain. Inn sabka schedule hum abhi bana lenge aur har kuchh hafte par use update karenge."

"Madam, yaha eisa koi banda nahi hai jo hume nahi jaanta ho to phir saadi dress ka kya fayda hoga?” Harilal ne puchha.

“Yaha ke log jaante hai; par bahar wale to nahi jaante hai naa! Hume bahar walo se hi jayada saabdhan rahne ki jaroorat hai. Chehra bhale hi pahchaan me naa aaye par Police ki wardi dur se hi pahchan me aa jati hai. Ab aap log group banane ke baare me sujhab de sakte hain. Hum partner badal-badal kar bhi group bana sakte hain par mera vichar hai ki hume jodi fix rakhni chahiye taki different conditions me kaun kaise react karta hai wo uske partner ko pata rahe aur wo isi ke anusar apna strategy bana sake."

Aparijita ne parakh liya tha ki din bhar thane me baithe baithe jayadatar logo ke sarir ko jung sa lag gaya hai aur unko patri par laane ke liye unhe phir se active karna parega.

Aparijita ke shrota paper par likhne me vyast ho gaye. Chand minuto ke baad Aparijita ne Gopal ke baare me baat chher di.

"Are haan! Maine kal Gopu ko gaate huye suna aur us se meri kuchh baat bhi hui thi. Wo bahut accha gata hai aur use geetkaro aur gayako ke bare me bhi accha gyan hai. Aaplogo ne uska dukh ke samay me accha sath diya hai. Aaplogo me se jo bhi sangeet me uski tarah ruchi rakhta hai wo use purane roop me waapas laane me jayada madad kar sakta hai. Mujhe aasha hai hum sab prayash karen to uska ghaav zald bhar jayega." 

"Madam aap se hui baato ke kaaran hi aur dino se Gopu aaj kuch jayada normal lag raha hai. Baaki din wo khush dikhne ki kosis karta tha par aaj wo andar se us had tak gamgeen nahi hai. Hum me se kisi ki bhi aapki jitni geet-sangeet ke baare me jaankari nahi hai; isliye agar aap use round ke liye partner bana len to bahut accha rahega." Harilal ne sujhab diya.

"Mere liye to accha hi rahega ki koi geet sangeet par baat karne wala mil jayega. Aur chunki uska quarter mere quarter se sate hi hai to ekdam bhor me ya raat me bhi wo mere saath round par nikal sakta hai. Par main eisa nahi chahti ki kal ko staff me se ko ye kahne lage ki madam ka munhlaga hone ke karan madam use jayda chhut deti hai. Waise bhi main suru me  apna dhyan ilake ko samjhane me lagana chahti ho taaki kisi vaardat ke baad apradhiyo ke bhagne ya chhipane ke jagah ke baare me kuchh guess kar saku. Isliye jungle aur uske sate ilako par meri khas najar rahegi."

"Madam, aapne aate hi pata laga liya ki kya karne se humara Gopu zaldi se normal ho jayega aur uska asar bhi hume dikhne laga hai; isliye use aap apne saath hi rakhiye. Thane me hamesa ek head constable aur hum dono me se ek ko rahna chahiye.  Jab aap aur Gopu nahi honge to Hari kaka aur main rahunga." Ghanshyam apna sujhab dete-dete Harilal ki aur dekha to paya ki Harilal bhi gardan hila kar sahmati de raha hai.

"Iske aalaba aapka plan jungle ki aur bhatkane ka bhi hai to aapke saath Gopu ka rahna aur bhi jaroori hai. Wo akela 4-5 bando ko dekh sakta hai aur saath hi gaon se madad bhi laa sakta hai. Isliye yeh hi final rakhe ki round ke liye Gopu aur aap partner honge. Baaki ka group mai bana deta hoon." Ghanshyam ne kaha.

Aparijita ne Ghanshyam aur Harilal se Gopu ko round par le jaane ke liye sifarish karwa liya tha. Isliye Aparijita ne koi virodh nahi dikhaya. Ghanshyam ne ek paper par round dene jaane waale group bana kar Harilal ko dikhane ke baad  Aparijita ko saup diya.

Aparijita chahti to groups khud bhi bana sakti thi par wo apne team ke har sadasya ko uska importance dikhane ka mauka dena chahti thi. Yeh dekha gaya tha ki planning me active role nahi milne se kai baar team members dil se plan se zur nahi paate hai aur kai baar iska parinaam plan ke fail hone se hota hai. 

Aparijita kafi der tak unse inhi visayo par baat kar quarter chali gayi.

Ghanshyam aur Harilal plan ke mutabik kaam karne ke liye baki staff ko samjhane ke baad aur kamro ke kaam ka intejam me lag gaye.

---------------------------------------------------------------------------

Harilal ne apne local contacts se dopahar tak sara building materials mangwa liya tha.  4  bajte bajte kuchh mazdoor aur rajmistri bhi aa kar kaam suru kar chuke the. Harilal bahut khush tha. Aaj pahli baar kisi afsar ne us par itna vishwaas dikha use itni bari jimmedaari bina kisi lecturebaazi yaa taane ki di thi.

Saam ko Aparijita ne quarter me phir dono ke saath meeting kar ho rahi gatividhiyo ke baare me jaankaari li. 

Baato ke dauran Harilal Gopu ke kitchen se chai bana laya. Chai peete hue Aparijita unhe apne laptop par kucch sansanikhej police cases ke baare me batane lagi. Saam 7 baje tak saari gaariya bhi theek ho kar aa gayi. Gaariyo ka test drive liya gaya aur santoost hone ke baad raat ke staff dwara motorcycle par random round maarne ka nirdesh diya gaya. Raat ke round ke liye staff ko vardi me hi jane ki hidayat thi.

Ghanshyam aur Harilal ne 2 aur constables ki madad se Aparijita ke quarter ke picchle darwaje ke paas ke ek hisse ko asthayi(temporary) office ka sakal de diya. Yeh tai hua ki jab tak kamro ka kaam complete nahi ho jata tab tak Aparijita, Gopu aur Japu yehi baith kar kaam karenge.

Saara din Aparijita apne maathato ke saath meeting ke aalaba police headquarters ke online files aur  Sarfarosh ke files se ilake ke baare me jaankari ikkatha karti rahi. Kal bhi usne kuchh satahi taur par check kiya tha par kal ka jayadatar samay wo thane ke case history hi dekhti rahi thi aur uska kafi samay ek-ek bande se baat karne me bita tha. Pahle se hi bhaichaare me rah rahe staff members ko ek level aur upar lakar unhe a mazboot team me badlana tha.

Premnagar thana Police department me shunting thana ke roop me badnaam tha. Yaha se 1 ruppaiye ki bhi rishwat milna muskil tha aur agar kisi ne naam-matr bhi riswat lene ka prayash kiya to gaaunwaalo ne turant uski sikayat aage tak kar dete the. Sayad isliye koi bhi yaha aana nahi chahta tha. Yaha bade adhikariyo ka aana-jaana bahut hi kam hota tha. Bare adhikario ko bhi pata tha ki yaha se unhe koi rakam ki bhent nahi milni wali hai. Thane me koi report saalo me likhane koi aata tha. In sabke karan yaha ka staff semi-retirement type ka life jee raha tha. Aparijita ko unhe phir se active mode me laana tha.

Police files aur staff se mile inputs se Aparijita jaan chuki thi ki kisi ko ratti bhar bhi iss jagah ko gher kar chal rahe shadyantra ke baare me andesha nahi hai. Thane ki team ke pure tarah se actime mode me aane se pahle Aparijita ko yaha ke local source aur Sarfarosh ke dusre agents se hi kaam lena tha.

---------------------------------------------