7.15 baje.
Aparijita ki puri team ek dusre se handsfree ke jariye confresscall me thi.
Aparijita ko chaar log 2-2 ke group me kandhe par lathho ki madad se hirano ko laate dikhe.
Agale 5 minutes me wo baaki hairano tak pahunch gaye. Billu ko Aparijita ne phone nikalte dekha.
"Boss, aa jao, ab sirf maal load karna hai." Billu ki awaz sunai pari.
Teen minute ke baad hi Aparijita ko van apne taraf aate dikh pari jo us se thori dur pahle sarak se niche utarte huye jungle ke andar chali gayi.
Aparijita ne apne saathiyo ko satark rahne ke liye ishara kar diya.
Aparijita drone ke jariye Billo aur Kanwarpaal par nazar rakhi hui thi.
Billo aur Kanwarpaal aage ke kisi bare orders ke baare me baat kar rahe the. Jabki baaki ke teen log van me hirano ko thoos rahe the.
Tabhi Aparijita ke paas Ghanshyam ka phone aaya.
"Madam didi, humne bailgaari laga kar raasta block kar diya hai. Iske aalba yaha kilo par chal kar tamasha dikhane waale ek bande se uska kilo bala instrument maang liya hai. Usne isse tarah de
sign karwaya hai ki isse kai hisso me khol kar lamba kiya jaa sakta hai ya phir aapas me jor kar bed banaya jaa sakta hai. Humne use ghaas aur kucch patto ki madad se sarak par bichha diya hai jiske kaaran ab koi bhi gaari yaha se nahi nikal paayegi. Agar aap izzazt de to hum bhi waha aana chahte hain."
"Theek hai, Tum aur Suresh waha se pero ke pichhe se daurte hue yaha pahuncho. Qadir wahi rahega taaki jarrorat parne par wo kilo waala patta waha se hata sake. Kisi bhi halat me wo akela apradhiyo se mukabla nahi karega."
Aparijita ne Suresh ko apne taraf aane aur Ghanshyam ko Gopu ki taraf jaane ko kaha.
Gopu ke side ke bando ko bata diya gaya ki Ghanshyam aa raha hai aur sabhi Ghanshyam ke nirdeso ka palan karenge.
7.35 par van me ladan ka kaam khatam hote hi Aparijita ne apne saathiyo ko final alert ka signal de diya. Jaise hi van sarak ke liye muri; Aparijita ke issare par Dinesh ne count down suru kar diya.
Jaise hi Dinesh ki count down khatam hui, Van sarak par chadhti dikh pari. Van Kanwarpaal chala raha tha.
Dinesh ne Police jeep ko sarak par aara-tirachha khara kar ke uske back me position le li. Baldev bhi uske saath dusre side se position liye khara tha.
Kanwarpaal abhi sarak par pahuncha hi tha ki kisi pret ki tarah Police jeep ko jungle se prakat hoke uska raasta rokte dekh kar bokhla gaya. Use pata tha ki Chaila ki taraf jaake wo aage phas sakta tha kyuki aage raasta band tha, phir bhi use umeed thi ki waha se wo log paidal jungle ke raaste bhaag sakte hain aur ek baar jungle me ghush jaane ke baad unko pakar paana muskil hota. Usne van ko brake laga ke picche morna chaha. Abhi van aari hi hui thi ki Aparijita ki chalai goliyo ne uska raasta rok dala.
"Dhai- dhai" lagatar 2 goliya chali aur van ke dahine taraf ke agla aur pichhala tyre brust ho gaya.
Kishore, Arjun, Raj aur Amit van ke rukte hi van ke baayen hisse ke tyres par goli chalane lage jiske karan agle chand seconds me baaki bache 2 tyres bhi brust ho gaye.
Tabhi waha chhote loud speaker par Gopu ki awaaz gunj uthi jo aparadhiyo ko haath utha kar van se bahar aane ko kah raha tha.
Aparijita ne Amit, Raj, Kishore aur Arjun ko dheere- dheere Japu aur Gopu ki badhte huye van ko gherne ko kaha.
Idhar Kanwarpaal pahle 1-2 minute to bhochakka sa baitha raha. Woh ek short-tempered banda tha. Phase hone ke baabjud wo aatm-samarpan ko taiyar nahi tha.
Kanwarpaal ne sabko AK 47 uthane ko kaha aur ek box ko seat ko paltate hue nikala. Usme kaafi extra magzine, kuchh hand-grenade aur 2 smoke grenade dikh rahe the.
Kai maihino pahle Kanwarpaal aur uske saathiyo ko Police ne ek baar gher liya tha jaha wo apne adhunik hathiyaro ke bal par 10 Police waalo ki team par bhaari pare the. Wo jaate-jaate ghayal police waalo ke sar me 10-10 goli maar gaye the jis se kisi ka bhi chehra pahchanne layak nahi bacha tha. Aaj bhi usne thaan liya tha ki wo kisi bhi Police waale ko zinda nahi chhorega.
Tab tak Ghanshyam aur Suresh apne saathiyo se mil chuke the.
Gopu ne ek baar phir se chetwaani di. Is baar uske taraf van se AK 47 ka ek brust fire aaya jo uske per ke aar me hone ke karan per ke mote tane me chhed karti chali gayi.
Aparijita ka clear instruction tha ki aparadhiyo ko zinda pakrane ke chakkar me kisi bhi prakar se extra zokhim naa liya jaaye.
Ab dono taraf se goliya chalne lagi thi.
AK 47 ke brust ke bich-bich me rifle aur revolver ki goliyo ki bhi awaz aa rahi thi.
Agle 2 minutes ke andar hi van ka windscreen gayab ho chuka tha aur van ki body me darzano surakh dikh rahe the.
Abhi tak dono taraf me se kisi ko bhi koi nuksaan nahi pahuncha tha. Dheere-dheere police team van ko chharo aur se gherte hue aage badh rahi thi.
Kanwarpaal apne chharo taraf police waalo ko ghera daalte dekh aur bhi jayada gusse me aa gaya tha. Billo paristhithi ko dekhte hue surrender karne ki salah de baitha jiske sunte hi Kanwarpaal ne uski maa-bahan ek kar di.
Achank Kanwarpaal ne box me 2 grenade nikala aur use Police jeep ke picche position liye Dinesh aur Baldev ki taraf ek ke baad ek uchhal diya. Van ke andar hone ke kaaran grenade uske soche gaye jagah se kuchh pahle jaa kar phate.
Baldev iske pahle kabhi iss tarah ke parsisthithi me nahi para tha. Jab uske kuchh duri par grenade phata to wo ghabra kar jeep ke picche se nikal para aur apne baaki saathiyo ki or daura. Usko iss tarah se bhagta dekh kar uske baaki saathiyo ka kaleja munh ko ho aaya. Wo sidhe maut ke munh me bhaga jaa raha tha.
Ghanshyam ke issare par udhar mauzod Police waale van par lagatar goliya chalne lage taaki koi Baldev ke angle par gun sidha naa kar sake. Iske baabjood 2 goliyo ne uske jaangh aur baanh ko zakhmi kar hi diya.
Baldev wahi gir para. Uske aaknho me maut ka khauf aur bhi gahra ho gaya tha.
Ab yeh chand minutes ki hi baat thi koi goli Baldev ka bheja ura deti. Tabhi Gopu Aparijita ke issare par sarak ke nicche hote hue ek khaas agle par firing karne Naldev ke paas pahucha tha, sarak par teji ke saath kuda aur Baldev ko apne baaho me lapetate hue sarak ki dusri aur ludhak para.
Gopu ko eisa karta dekh kar Billo ne uspar kai goliya chalai jo Gopu ke agal-bagal se nikal gai.
"Boss, hum log chuho ki tarah yaha phans gaye hain. Agar issi tarah van me baithe rahe to hamara kirya-karam yehi ho jaayega." Billo ne goliyo ki awaz ki bich chiilate hue Kanwarpaal se kaha.
"Tu theek kah raha hai. Sidha jaane ke to swal hi nahi hota. Agar hum baaye taraf bhagenge to aage jaake Daduli ne phas sakte hai. Hume dahine taraf ke jungle me ghusna hoga jaha ghane jungle me hamare bachne ke chances jayada hain. Dahine taraf se ek police waal kam hua hai. Maine uske chhupe hone ki jagah ke baare me andaaz laga liya hai. Udhar abhi 4 log hain. "
Kanwarpaal ne niche jhuke hue hi 2 spot bataye.
"Agar hum grenade phenke to unhe picche hatna parega aur hume waha" usne ek aur spot ki taraf isshara karte hue kaha -"pahunchne ka mauka mil jaayega. Us jagah se hum inka mukabla kar sakte hain. Hamare paas 2 smoke grenade bhi hai. Jaise hi Billo aur main dahine taraf hamla karenge, tum dono baaye traf yeh smoke grenade phenk dena. Us se baayen taraf se koi bhi turant hamare pichhe nahi aa payega aur hume dahine taraf se bhagne ka mauka mil jayega. Ek baar hum daayen taraf position lene me kamyaab ho gaye to phir hum aasani se laase bichhate hue nikal jaayenge. "
"Boss, wo log to hume niche utarye hi ura denge! Kyu naa surrendar kar diya jaaye." Ek ne chintit swar me kaha.
"Policewaalo ka ek saathi buri tarah zakhmi hai. Tujhe kya lagta hai ki wo tujhe surrender karne par zinda chhor denge. Wo tab bhi maar daalenge to kyu naa chance liya jaaye. Chalo suru ho jaayo!"
Idhar Gopu ke apne jagah se aage badhte hi Rohit apne morche par akela ho gaya tha, Isliye Aparijita ne Amit ko teji se Gopu ki jagah par pahunchane ko kaha. Raj aur Ghanshyam ko aas-paas rahte hue unke taraf se van ko cover karna tha.
Abhi Amit jhuke-jhuke apni jagah chhor kar Rohit tak pahucha hi tha ki tabhi Kanwarpaal aur Billo ne grenade se Amit waali jagah par lagatar ek ke baad ek hamla liya, jabki uske dusre saathi baayen taraf smoke grenade se hamla kar chuke the.
Amit grenade ki wajah se bane hawa ke dawab me gir para, halaki use kharoch bhi nahi aayi thi phir bhi Amit ne jab picche mur kar dekha to ek pal ko sakit ho gaya. Wo aankhe phaare us jagah ko dekh raha tha, agar wo usi jagah par hota to uske sarir ke chhitre ud gaye hote. Agle hi pal uske kaano me Aparijita ki awaaz gunji aur usne bhaag kar Rohit ke paas phunch kar position le liya.
Idhar jaise hi Aparijita ne grenade se Kanwarpaal aur Biilo ko hamla karte dekha to uske samajh me unka plan aa gaya.
Aparijita bike tak daur kar pahunch us par chhalang laga kar baithate hi bike van ki aur mor diya.
Ab tak Billo aur Kanwarpaal sarak se nichhe utar chuke the jabki ek nichhe uatarne wala tha. Jabki 2 apradhi Amit aur Ghanshyam waale angle par fire karte hue sarak se niche jaane ki kosis kar rahe the.
Tabhi Aparijita ke beawaz bike ekdam se hawa me prakat hui aur unke upar se gujarne lagi.
"Dhai- dhai" lagatar 2 goliya chali aur dono ke sar ke pichhle hisso me chhed dikhne laga.
Un badmaaso ke sarir se aatma unke sarir ke zameen ko chhune se pahle hi tarap kar nikal gayi.
Jab tak koi kuchh samajh pata Aparijita bike samet aage kahari Police jeep ke paas pahucnh chuki thi.
Sarak par safed dhua faila hua tha jiske karan Japu ke taraf ke saare members aage kuchh nahi dekh paa rahe the. Aparijita ne unse thora bara ghera kaat kar dusri taraf 2 hisso me Amit aur Ghanshyam tak pahunchane ko kaha. Kishore ko Baldev ke paas rahne ko kah kar Gopu aur Dinesh ko Aparijita ne bike ke picche baitha kar bike sarak se nichhe utar jungle me ghusa di.
1.5 minute ke baad bike jungle me ek unche jagah par khari thi. Yaha se Kanwarpaal ki gang range me thi aur inhe patthro ki oat haasil thi. Aparijita ne Dinesh aur Gopu ko wahi chhor aage ki or nikal pari.
Kanwarpaal ne jab apne pichhe awaz sunke picche mur kar dekha; tab tak uske karne layak kuchh nahi bacha tha kyuki bike jeep ke picche pahunch chuki thi aur uske do sathi mudra bane zameen sungh rahe the.
Kanwarpaal ne jo upper hand haasil kiya tha wo Aparijita ke karname ke kaaran khatam ho chuka tha. Itna fayada Kanwarpaal ke team ko jaroor hua tha ki ab wo log van me phase nahi the.
Kanwarpaal ke team ke upar Ghanshyam, Raj, Rohit lagatar rifle aur revolver se goliya chala rahe the. Kanwarpaal zald se zald apne plan ki jagah par pahunchana chahta tha.
Kanwarpaal ke chehre par apne tai kiye jagah par pahuchte hi muskaan phail gayi. Usne Billo aur dusre saathi ko isshara kiya ki ab yaha se nikal chalo.
Kanwarpaal aur Billo picche mur-mur kar brust fire kar rahe the taaki koi police waala unke picche naa aa sake. Idhar unka saathi apne daayen-baayen goliya chalata aage badha hi tha ki rifle ki ek goli sidhe uske baanye aankh me ghush kar sar ke picche se nikal gayi. Usi waqt rifle ki ek goli uske gale me aa ghusi.
----------------------------------------------------------
Dinesh aur Gopu ne aate hi apne position par dam saadh kar baith gaye the. Unhe teeno apraadhi apni or goliya barsate aate dikh rahe the. Par unke movement aur us jagah ke banawat ke karan wo nissane par aa nahi rahe the.
Dinesh fire karne ko uatabla ho raha tha par Gopu ne uska haath thapthapa kar use wait karne ko kaha. Idhar se goli naa chalne ke karan abi tak apraadhio ko unke iss position par hone ki khabar nahi thi.
Zald hi Gopu aur Dinesh ko mauka mil gaya!
Jaise hi teesra apraadhi unke range me aaya, Gopu aur Dinesh ki rifles aage-peeche garaj uthi. Gopu ki goli ne jaha aankh ko nissana banaya tha wahi Dinesh ki Goli ne gale me hole kar diya tha. Goliya lagte hi wo apradhi zameen par gir para aur 2-3 baar eiriya ragar kar hamesa ke liye shant ho gaya.
Apne saathi ko iss parakar marte dekh kar Kanwarpaal ek pal ko bhauchakka sa rah gaya. Abhi tak to wo behtarin position par the. Agar Gopu aur Dinesh us position par nahi hote to wo log aasani se ghane jungle me khisak sakte the. Saamne manzil dikh rahi thi par wo nikal nahi paa rahe the. Pathharo ki oat ke karan unki AK-47 bhi bekar thi. Ek hi possiblity thi ki jaise hi undono me se sar utha kar goli chalaye Billo aur wo unhe nissana bana len. Par yeh dur ki kauri lag rahi thi.
Tabhi Kanwarpaal ke dimaag me ek idea aaya.
Kanwarpaal ne Billo ko issare se bataya ki wo lagatar un patthro ki taraf goliya barsata rahega jis se us position se koi bhi sar nikal kar unpar nissana na laga sake aur iss bich Billo kucch kadam aage badhega, phir Billo unpar goliya barsayega tab Kanwarpaal aage badhega.
Idhar Kanwarpaal aur Billo apne naye plan ke tahat badh rahe the; jabki Ghanshyam, Raj, Amit aur Rohit; Aparijita ke issare par pero ke picche se chhupate hue unko gherne aaage ki or badh rahe the. Baaki Police team bhi tab tak sarak paar karke iss taraf aa chuke thi aur dheere-dheere aage badh rahi thi.
Tabhi Kanwarpaal aur Billo ke kismat ne saath chhor diya.
Kanwarpaal Billo dwara chalai golio ke cover-fire me aage badh raha tha ki achanak Billo ka pair niche se gujar rahi ek per ke lata me jaa uljha aur wo munh ke bal gir para. Uske haanth se gun nikal kar dur gir pari.
Chand seconds pahle Aparijita ne bike pathhro ke aar me khari ki thi. Yaha se wo Kanwarpaal aur Billo par dahine taraf se fire kar sakti thi jabki Goup aur Dinesh baayen taraf se fire kar rahe the.
Jaise hi Billo gira to Kanwarpaal ne jaldi se Gopu aur Dinesh ki taraf goliya barsane laga. Jiske karan Gopu aur Dinesh apna sar utha kar unpar nissana nahi bana paa rahe the. Jiska fayda uthane ke liye Kanwarpaal ne Billo ko ishara kiya.
Tabhi lagatar "Dhai- dhai- dhai" 3 fire hue aur Kanwarpaal apne seene me chhed liye girne laga. Uske chehre par aacharya ka bhaav tha ki jaise use viswaas hi nahi ho raha tha ki wo mar kaise raha hai. Usne apni band hoti aankho se apne daahine taraf position liye Aparijita ko dikha jiske revolver se abhi bhi dhua nikal raha tha. Yehi aascharya ka bhaav uska antim bhaav saabit hua aur wo chehre par aascharya ke bhaav liye hi mar gaya.
Iss bich Gopu aur Dinesh ko mauka mil gaya aur unhone gire AK 47 ko uthane ke liye daurte Billo par fire karna suru kar diya. Un dono ki ek-ek goli Billo ke kandhe aur jaangh me ghush gayi. Goliya lagte hi Billo niche girane laga. Usi waqt Aparijita ne bhi Billo ke seene par 2 fire kiya par wo uske nicche girate hue position ke karan chhati ke bichobich naa lag ke chhati ke uppari hisse me jaa dhasa.
Billo girte hi dikhna band ho gaya jabki AK-47 aage pari abhi bhi dikh rahi thi.
Aparijita ne golibaari band karne ka nirdesh diya. Aparijita bike ki taraf bhagte hue 3 members ko van ke paas gire aparadhiyo ko chek karte hue aage gire teesre apraadhi ko check karne ko kaha; jabki baaki sabko Kanwarpaal aur Billo ki taraf teji se badhne ko kaha.
Aparijita ne ek baar fir se bike uthayi aur teji se us jagah ki or badh chali.
Aparijita ne waha pahunch kar precaution ke liye gire Kanwarpaal ke pair me ek goli aur maari jispar Kanwarpaal ke taraf se koi reaction nahi hua. Ab wo Billo ki taraf badhi jo abhi bhi jinda tha aur apne seene ko thaame tarap raha tha.
Aparijita ne pair ke thokar se Billo ke AK 47 ko waha se dur kar diya. Aparijita turant hi Billo se pucch-taachh karne lagi jo mobile par record bhi ho raha tha.
Billo ne apne tootati saanso me Aparijita ko bataya ki Wo log lambe samay se iss dhandhe se jure the aur idhar ke 6 mahine me wo Premnagar aur uske aas-paas ke jungle me kaam kar rahe the. Yaha unhone kuchh eiase phal dhoondh nikale the jo hirano ko kaafi pasand the. Wo kai dino tak jungle me unhe faila kar hirano ko lalchate the aur phir ek raat usme zahar mila dete jiske karan bagair goli chalaye kuchh hirano ka sikar kar liya jaata tha. Uske baad wo phir koi dusra illaka chunate the. Yaha se samabandh rakhte ek powerful bande ne unse contact karke yaha ke baare me bataya tha aur AK-47 jaise hathiyaar bhi uplabadh karwaye the. Isske pahle ki wo us bande ka naam batata , Billo ki sanso ne uska saath chhor diya.
Ab tak Baldev aur Kishore ko chhor kar baaki saare members waha pahunch chuke the.
Aparijita ne Baldev ki halat check kiya. Use koi jaanleba chot nahi aayi thi par use aane waale kai din bed par hi bitane the. Aparijita ne Kishore aur Raj ko Baldev ko hospital le jaane ka nirdresh diya.
Van ke picchle hisse ko khol kar dekha gaya to 9 hirano ke dead body mile. Aparijita ne phone karke road block khol kar waha mauzod logo ko thaane jaane ko kaha.
No comments:
Post a Comment