Wednesday 6 March 2019

Gopu ki training ki suruaat

Dusre din subah 6.20 baje Gopu ka mobile baj utha.

Dusri tarf Aparijita thi jisne use cycle ke saath thane se 200 meter aage 15 minmute me milne ko kaha.  

Gopu bahut teji se batayi jagah par pahuncha to use Aparijita kahi dikhayi nahi  di. 

Shalwar-kameez pahni ek ladki apni cycle ko saaf karti hui bataye jagah par dikhi. Wo ukdo baith kar  picche chaake ko haath se pandal chala kar dekh rahi thi. Ek to uska chehra sarak ke dusre aur tha aur upar se usne duptta sar se iss tarah dhak rakha tha ki chehra kya uske baal tak nahi dikh rahe the. 

Gopu thori der idhar udhar Aparijita ko dekhta raha phir larki ki madad karne ke liye aage badha. 

"Kya, aapke cycle me koi problem hai?" Gopu ne paas jake puchha.

Tabhi larki muri.

Gopu larki ko dekh jaise aaswan se gira. Are! Ye to Aparijita thi. 

Aparijita ne gaaun ke kisi sadharan  larki ki tarah kapre pahan rakha tha aur to aur usne pata nahi kaha se ek purani lady cycle bhi jugar kar liya tha. Wo eisi larki lag rahi thi jisko sahari hawa chhu bhi nahi gayi thi.  Gopu aankhe  phar-phaar ke Aparijita ko dekh raha tha. Uska munh acharya se khul gaya tha. 

"Are, Madam; aap!"

"Chalo." kahti hui Aparijita apni cycle stand se utar paidal hi aage badhne lagi. 

Gopu bhi jaldi jaldi pair chala kar uske paas pahunch paidal hi saath saath chalne laga.

"Madam ! Yeh cycle jaani pahchani lagti hai."

"Haan. Yeh Gauri ki hai. Isse maine parso Harilalji ke yaha dekha tha. Gauri ab isse bahut kam chalati hai. Kal maine 1 hafte ke liye Gauri se isse maang liya."

Aparijita ne 100 kadam chal kar sarak se thora hat kar ek  per ke neeche cycle ko stand par laga diya.
Yeh bare area me pahila ek bahut purana bargad ka per tha jiski jataye satah se 10-12 feet upar tak aa rahi thi. Iske neeche gaun walo ne baithne ke liye kuch lakri aur cement ke bench banwa diya tha. Paas hi me paani pine ke liye ek handpump bhi tha.

Aparijita ek cement ke bench par aa kar baith gayi.  Paas hi ek mote lakri ka gol kata tukra jameen me gar kar ek insaan ke baithne ka intzaam kiya gaya tha.  Gopu us par aa kar baith Aparijita ko prasansuchak nazaro se dekhne laga. Uske samajh me nahi aa raha tha ki madam ko achanak kya sujhi ki 100 kadam par hi baith gayi.

Aparijita confused Gopu ko dekh kar muskaryi. 

Aparijita ne apne kapre ke bag se ek tablet (mobile computer) nikal us par Gopu ko ek map dikhate huye samjahne lagi.

"Dekho. Yeh humara aaj ka round ka route hai. Maine internet aur thane se tumlogo se mili jaankariyo ke upar apna pura program banaya hua hai.  Aaj hum iss raste me aage parne wale ek chhoti pahari tak jayenge. Hum waha ka aaj sarsari taur par muyana karke aayenge."

Gopu bare gaur se baaten sun raha tha . 

"Japu ne mujhe bataya tha ki iss hisse me koi apne jaanwar charane bhi nahi le jaata hai. Yaha abhi sahro wali hawa nahi chali hai isliye gaon ka koi jora bhi waha nahi dikhta hai. Hume waha eisi jagaho ki pahchan karni hai jaha par kisi ke kafi aane jaane ke nissan pare hain. Saath hi saath eisi jagah ka bhi khayal rakhna hai jo zaroorat parne par jungle me andar jaane ke raaste ke taur par istemaal kiya jaa sakta ho.  Maine kuchh jagho ko mark kiya hai jise hum dheere-dheere check karenge aur saath hi daily ke rounds se uplabdh jaankari ko bhi list me update karte jaayenge."

Itna kahkar Aparijita ne Gopu ko un jagho ke baare me batane lagi. Gopu ne apne kuchh andaze bataye jise turant hi update kar dono cycle chalte hue aage badhe. 

Thori dur aage badhne par sarak ke dono taraf kuchh ghar dikhne lage jo sarak se 100-125 kadam ke duri par dono taraf banayee gaye the. Kuchh aur aage badhne par sarak se ek 12-14 feet chuara kaccha rasta nikalta hua dikha . Aparijita ne mor par cycle rok kar jagah ka jaayaja lena suru kiya. 

Gaaun ke gharo ka jayadatar hissa pakka bana hua tha par kuchh-kuchh hissa kaccha bhi tha. Har ghar ke saath ek chhota sa bagicha tha aur kucch gharo ke paas kuchh paalto bakariya, gayen yaa bhainse bandhi thi.  Sarak ke ek taraf ghar dur tak faile hue the jabki dusri taraf kuch chhote chhote kothri numa gharo ke baad khet aur taalab dikh rahe the.

Kuch dur kheto me kuchh log datun karte hue dikh rahe the.  Kheto ko sarak se jorne wala kachha raasta 7-8 feet chuara hi tha. Kheto wale bhaag me ek chhota sa talab sarak se paas hi dikh raha tha jisme kuchh Kamal ke phulo ke saath kuchh dusre paani me khilane waale phool dikh rahe the. Taalab me kuchh Hans aur Batakh tair rahe the. Dur kheto ke peeche jungle suru ho gaya tha. 

Abhi kheto ke paar oonche-oonche pero ke peeche se muskurata hua suraj apne rath par sawar dheere dheere laalima phailate huye aage badh raha tha. 

Kheto me mauzud chand lobo ke aalaba naa to gharo waale gaaun ke bhaag me aur naa hi sarak par koi bhi aadamzaad dikh raha tha. Charo taraf bahut shanti thi jo kabhi kabhi chiriyo ki chachahat se kuchh pal ke liye tut jaati thi. Chiriyo ki chachahat kaan ko bahut bhali lag rahi thi. Aparijita sahar ke sor-gul se dur eisa mahool pakar jaise kho hi gayi thi. 

Aparijita cycle chhor kacche sarak par pahunchi aur kuchh dur tak sarak par aage badhi . Wo sarak ko gaur se dekh rahi thi. Gopu ko samajh me nahi aa raha tha ki wo kya gaur kar rahi hai. 

Aparijita ne kheto ko jorne wali sarak ko isi prakar dekha aur phir cycle chalate hue aage badhne lagi.
Raaste me Aparijita ne Gopu ko raasta ka muyana karne ke baad apna niskarsh bataya.

"Gopu, un raasto par bane nissano se pata chalta hai ki iss raaste se lohe ke pattar lage pahiye waali bailgari; kuch tyre bale bailgari aur cycles hi chale hai. Us raaste se motorcyle bhi guzra hai par wo 2-3 din pahle."

"Madam, bailgario aur cycle waali baat to samajh me aati hai; par motocycle 2-3 din pahle guzari hogi yeh aap kaise bata sakti hain!" Gopu ne aascharya prakat karte huye kaha. 

Gopu ke swar me tanz nahi balki sachhi gigyasa dikh rahi thi.

 Aparijita ne Gopu ko detail me bataya ki kaise usne ye niskarsh nikala hai ki bailgaari ke pahiyo me lohe ke pattar lage the aur kaise yeh samjha ki motorcycle waale nisaan 2-3 din purane the.

Gopu Aparijita bahut prabhavit dikhne laga. Wo Aparijita ke baariki pakrane ke dhang se dang rah gaya. Aparijita ne baato ke dauarn cheejo ko parakhne ke liye jo tips bataye the wo usne aage ke liye yaad kar liya.

-----------------------------------------------------------------------

2 Km cycle par aage  ke baad phir se dono taraf sirf per-paudhe dikhne lage.  Aparijita   gaur se dono taraf dkhte hue cycle chala rahi thi. Us se 3 kadamo ki doori par Gopu bhi usi raftaar se aa raha tha. 
Kucch aur aage badhne par phir se kuchh ghar dikhaye diye par inki shankya pahle se kam thi. Yaha 10-12 ghar the aur sab ke sab kacche bane huye the. Isske aage badhne par unhe aage poore raaste me kanhin aur ghar nahi dikhayi diya. 

Dono apne mazil tak pahunch gaye the. Sarak se baaye taraf ek chhoti si pahari dikh rahi thi. Use geography ke rules se to pahari nahi kaha ja sakta tha par gaaun wale use pahari hi kaha karte the.  Gaaun ke log kabhi-kabhi pariwar ke saath yaha picnic manane aate the. 

Sarak ke paas se hi halki- halki chadhayi suru ho gayi thi. Dono apni cycle ek per ke niche lock kar paidal hi aage badhe. 

pahari par prakritik taur par ek raasta sa ban gaya tha jispar Jeep jaisi koi gaari bhi kuchh dur tak laai jaa sakti thi. Yeh  prakritik raasta ek bade se chabutare numa jagah par khatam hota tha. Chabutare ke dusri taraf khaai thi.  Khaai ke paar dur phir se ghana jungle suru ho raha tha. Chabutare ke bagal se aage pahari par jaane ke liye patli patli pagdandiya dikh rahi thi. chabutare numa jagah par bhi kai bare per dikh rahe the.

Aparijita ne iss jagah ka muyana suru kar diya. Kucch pero ke neeche einto se bane chule dikhe jinme se kucch me adhjali lakariya bhi pari hui thi.  Aparijita ne Gopu ko chabutare ke uss hisse ko puri tarah check karne ko kah khud dusre hisse ki aur badh gayi. 

Gopu thori der baad Aparijita ke paas ek videshi sarab ki khali bottle liye pahucha. 

"Madam! Jaha tak main janta hoon Premnagar me sirf ginti ke log hi sarab pite hai aur wo bhi deshi. Desi sarab bhi wo log sirf Holi ya eise hi kisi khas mauke par pite hai. Inke purkho ne nirnay liya tha ki wo kabhi videshi sarab nahi piyenge aur gaaun waale abhi bhi us nirnay ko dil se maante hain. Mujhe lagta hai ki koi bahar ka banda yaha ghumte hue aa gaya hoga aur peene ke baad khali bottle phenk kar chala gaya hoga." 

Aparijita uski baat sun kar muskurayi . 

"Tumhe etni jaldi kud kar kisi ek natije par nahi pahunch jaana chahiye. "  Thora rukne ke baad  Aparijita ne use apne vichar batane suru kiye.

"Ab iss bottle ke yaha hone ki possiblities suno."

Pahla kaaran yeh ho sakta hai ki yeh kisi gaun wale ka hi kaam hai. Use kanhi se mil gayi hogi. Usne yaha chupaaya hoga aur sabki nazare bacha yaha pine aata hoga. Aur jab khatam ho gayi to usne bottle yehi chhor di.

Dusra jaisa tumne kaha ki koi bahar se ghumta phirta aaya hoga. Halaki agar yaha se dekho to kisi anjaan sakhas ka yaha sidhe aana muskil hai. Hum yeh sambhavna maan lete hain ki wo sarak par kisi wajah se ruka hoga aur ghumte huye yaha pahunch gaya hoga. 

Teesri sambhavna yeh jo sakti hai ki yeh bottle kisi eise bahari aadmi ne chhora hoga jo iss ilaake se parichit hai aur yaha aata jata rahta hai. Mera teesri sambhavana par jayda jor hai. Iske aalaba bhi kai aur sambhavnaaye ban sakti hai." kah Aparijita kuchh aage badh gayi.

Gopu jo abhi tak yeh samajh raha tha  ki wo apne iss quick logic se Aparijita ko impress kar dega. Wo do aur sambhavnaaye sun kar awak rah gaya. Ab use lag raha tha ki teeno sambhanaye theek ho sakti hain. Wo jaanta tha ki yeh kisi investigation ka hissa nahi hai par wo samajh gaya tha ki Aparijita use ek example dwara yeh bata rahi hai ki nirnay lete waqt kud kar kisi ek natize par pahuchne ke waajaye aur bhi sambhavnayo par vichaar karke hi nirnay lena chahiye. Aparijita ne jitni sahaz tarike se use itni mahatpurn baat bina kisi updesh ke samjhai thi us se wo Aparijita ke budhimaani ka aur kayal ho gaya. 

Gopu khare-khare ein baato par gaur kar hi raha tha ki use Aparijita ki awaaz sunai pari jo use bula rahi thi. Gopu sochne me itna kho gaya tha ki use pata hi nahi chala tha ki kab Aparijita waha se jaa chuki thi.

"Main  teesri possibilty par jor eis liye de rahi hoon kyuki yaha us se milte julte saboot hain. ..." 

 ----------------------------------------------------------------

Dopahar 12.30 baje ke karib HariLal aur Ghanshayam se Aparijita apne temporary office me mili. Aparijita ne unhe aaj chhoti pahari ki taraf jaane ki baat bata unse discussion suru kiya.

"Main aaj Gopu ke saath 6.30 baje hi nikali thi. Hume lautne me 10 baj gaye the. Main kal subah 5-5.30 baje nikalna chahti hoon. Hume lautne me sayad 11-12 baj jaye. Main kal raaste me parne wale gharo ko nazdik se bahar se dekhna chahti hoon aur wo bhi unke nivasiyo ke uthne se pahle; isliye subah jaldi jaana parega. Abhi kuchh dino tak issi tarah ka mera routine rahega ya to subah kuchh ghante ilake ke bhari hisso ko samjhne me lagega ya phir saam ya raat ka samay. " 

Aparijita ne 2 second ruk kar dono ko dekha aur phir bolne lagi.

"Aaplog Gopu se baat kar len ki agar wo iske anusaar apne ko dhaal sakta hai to theek hai nahi to mere saath shift ke anussar koi aur constable ko attach karen. Main kisi par dawab daal kar ye kaam nahi karana chahti kyoki ek to main yaha se anjaan hoon aur dusra partner jab tak man se saath nahi dega tab tak iss saari kabayat ka pura fayda nahi milega "

 "Madam! Yeh aapka barrapan hai ki aap apne maathato ka itna khayal rakhti hain. Gopu ko koi problem nahi hogi. Uska aapke saath ab to aur rahna jaroori hai. Gopu aapke bilkul paas rahta hai isliye aap uske saath raat ya subah kabhi bhi nikal sakti hain aur saare constables me wo sabse jayada bahadur aur furtila hai."  Ghanshyam ne Aparijita ki baat ko ansuna karte hue ek tarah se apna phaisla hi suna diya.

"Tumhari baat apni jagah thik hai par yeh bhi to sach hai ki jo banda mere saath aage kucch hafte nikalega uska khane-peene sone -jagne ka routine bigar jayega . Isliye us se pucch lo aur agar thora sa bhi jijhak dikhe to alag-alag logo ki duty laga dena. Aur main chahti hoo ki daily ke daily baaki logo ke round ka report naa lekar 2 ya 3 dino par liya jaye haala ki wo apni report daily banayenge.  Hume nigarani walo  jagah ki bharmaar nahi karni hai balki un jagho ko chhatna hai jaha nigarani ki jaroorat hai. Agar kisi jagah par shaq ho to shaq wali jagah ko dusre teesre din bhi dekh kar confirm karna hai ki baakai us jagah ki extra nigrani ki jaroorat hai yaa nahi. "

"Madamm, aaj hi mai sabko aapki baat samjha dunga par Gopu bali baat par aapko humari suggestion manana chahiye. Chuki aap phir bhi jor de rahi hain to main Gopu se baat kar lunga."  

Aparijita ne iss par koi baat naa kah Ghanshyam aur Harilal se Premnagar ke history aur waha ke riti-riwaz ke baare me baat karne lagi. 

----------------------------------------------------------------------------

Thane me Ghanshayam ne baaki sabhi staff ko meeting ke liye bula kar Aparijita ke chhanbin wale instruction ko sabko batane ke baad   Gopu se akele me puccha ki agar wo madam ke saath itni hard duty nahi karna chahta hai to wo madam ke saath shifting par dusre logo ki duty lagayega.

“Sirji, naukri me nakhra kaisa! Jaisa bhi kaam ke hukum milega wo to karna hi hai. Aur phir madam ke saath kaun nahi kaam karna chahega. Un me afsaro wali ghamand bilkul nahi hai aur unke saath rahne par sikhne ko bhi kaafi kuchh milta hai." Gopu ne Aparijita ke saath duty se khud se jore rakhne par jor dete huye kaha. 

Gopu ne Ghanshyam ko Aparijita ke karnaamo ke baare mebatane laga ki kaise Aparijita ne  sarak par taaja aur bilkul dhundle pare nisaan se us par chale vahano ka apna andaza bataya. Ghanshyam ne kuchh sabd sunte hi baake members ko bula Gopu ko sabko aaj Aparijita ke saath kiye gaye round ki kahani batane ko kaha. 

"Sirji! Yeh to jaldi promotion paake aapki jagah lena chahta hai." Rohit naam ka constable jo Harilal ke quarter ke bagal ke quarter me rahta tha, ne kaha . Uske lahje me mazak wala tone na hokar vayang tha aur wo isse chhupa bhi nahi raha tha.

"Sirji! Aap to madam ke saath Rohit ki hi duty laga den. Yeh bechara bhi jaldi se head constable ban jayega. Main promotion paane ke liye thore din aur wait kar lunga."  Gopu ne muskura kar Rohit dawra phenki gayi bouncer ball par hook shot lagate hue kaha.

"Hi hi hi!  Gopu bhai to bura maan gaye; main to mazak kar raha tha." Rohit ne daat nikalte hua kaha. Wo andar se dara hua tha ki agar uski duty madam ke saath lag gayi to uski to dhang se lag jayegi . 

"Tum dono me se kaun madam ke saath duty karega ye tum dono mujhe phaisla karke jaane se pahle me bata dena taaki main madam ko aage bata saku. Dono ka quarter thane ke campus me hi hai; isliye madam ko bhi koi problem nahi hoga." Ghanshaym ne Rohit ki sthithi par maza uthate hue kaha.

Saam tak Rohit Gopu ko madam ke saath duty karne ko manane ke liye uske aage-peeche ghumta raha. Bich-bich me wo kabhi Ghanshaym to kabhi Harilal ke paas jata aur different – different tarike se batane ki kosis karta ki Gopu hi iss kaam ke liye theek hai.  Jab wo jayada hi dimaag chaatne laga to Ghanshayam aur Harilal ne use uske bolne ke lahje ke baare me daanta. 

"Tumhare aalwa kisi ne eisi baat nahi ki thi. Yaha sabko pata hai ki agar kuchh sikhne ki baat nahi bhi hoti tab bhi Gopu yeh kaam khushi-khushi karta. Tum to Gopu ko itne saalo se jaante ho aur yeh bhi jaante ho ki wo chaaplusi karne wala banda nahi hai." Ghanshyam ne Rohit ko daante hue kaha.

"Gopu ko koi jaroorat nahi thi ki jo usne aaj sikha wo humen bataye; par wo gyan hume bhi mil sake isliye usne hume bataya aur tumne uska mazak udaya. Yeh thana auro se alag hai aur yaha sabhi pariwaar ki tarah rahte aaye hai. Tumhe iss baat ka dhyan rakhna chahiye tha." Harilal ne use samjhate hue kaha. 

Rohit kafi sharminda tha; isliye dono ne uski aage khichayi nahi ki. 5.30 baje Aparijita ko phone karke bata diya gaya ki Gopu hi uske saath as a partner kaam karega.   

----------------------------------------------------------------------------------------------------

2 comments:

  1. इस हिस्से में कहानी बढती हुई नहीं लग रही।

    ReplyDelete
    Replies
    1. यह अपडेट आगे आने वाले अपडेट के लिए ज़मीन तैयार कर रहा है।

      एक ऐसा व्यक्ति जो निराशा में घिरा रहा हो उसे फिर से पूरी तरह से एक्टिव करने के लिए पहले छोटी-छोटी कामयाबी उसे दिला कर उसमे यह विस्वास दिलाना पड़ता है की वो अभी पूरी तरह नहीं चूका है।

      इस भाग में यह दर्शाने की कोशिस की गयी है कि कैसे छोटी छोटी बातो का ख्याल रखने से उस से महत्पूर्ण जानकारी मिल सकती है। साथ ही अपरिजिता गोपू से लगातार सलाह लेते और काम देते हुए बड़ी चालाकी से उसे व्यस्त कर उसे फिर से एक्टिव ड्यूटी में लाने का प्रयास कर रही थी. इस अपडेट में यह साफ़ पता चल रहा था की अगर गोपू नहीं भी होता तो अपरिजिता यह काम कर लेती।

      अपरिजिता ने पहले ही दिन बता दिया था की वो अभी अपनी joining गुप्त रख काम करना चाहती है। इस भाग में संक्षेप में अपरिजिता की डेडिकेशन के साथ सहकर्मियों के बीच होने वाले नोक-झोंक को भी दर्शाया गया है। जूनियर रोहित द्वारा व्यंग किये जाने पर भी सीनियर गोपू और घनश्याम ने जिस तरह से बात को हैंडल किया वो यह दर्शाने की कोशिस थी की बगैर करवाहट लाये भी ऐसी बातो को हैंडल किया जा सकता है।
      thanks for your kind reply

      Delete